而家啲figure郁啲都賣幾嚿水，就算幾鍾意都好，窮L就只能夠唱「我負擔不起」（高八度）～但係忠實嘅fans又點會畀呢啲嘢難到呀？台灣有個模型達人，靠竹筷子同雪條棍就可以將動畫同電玩遊戲入面嘅兵器神還原，而佢最近嘅大作就係《海賊王》入面卓洛嗰幾把名刀喇。

淨係睇劍套都見到個還原度幾高啦～有啲劍套花紋特別細緻，全部都係呢個神之手慢慢雕出嚟㗎。你咪以為得個套呀，入面堅有料，把刀係拉得出嚟㗎。入面把刀可能對於外行人嚟講，咪又係刀，不用分得那麼細啦～但係對佢嚟講每個細節都咁重要，所以連劍銷嘅紋都跟到十足十呀！

嗱，有圖有真相，絕對唔係個啲因為時間關係個window 就update咗嘅示範，真係用筷子慢慢削㗎。唔信，上youtube有埋片，逐個步驟做埋你睇?～毛毛睇到都痛都頭埋呀，枝筷子仲幼過手指，啲紋咁細仲要逐下雕，真係不禁叫佢一聲「雕兄」呀！竹筷子可以變成刀，咁豆漿都變成白膠漿啦！

除咗《海賊王》，佢喺Facebook仲PO咗好多其他作品㗎，連LOL入面易大師把劍都有，連個環都整埋出嚟呢下真係冇得輸！毛毛睇完覺得好勵志呀，你諗下，連竹筷子同雪條棍都可以整到咁靚，咁即係一碌廢柴如你同毛毛都一定有用武之地啦～你話係唔係呀，哈姆太郎？

封面圖片及資料來源：隨手藝術夢想家／Facebook、3Tyears 三千試煉／Youtube