雖然今日啲天氣都仲係好熱，不過毛毛憑感覺知道冬天應該離毛毛不遠矣。一諗到遲下凍到阿媽都唔認得，毛毛就想匿埋喺個被竇入面射波唔扮工喇！不過唔好話毛毛，連喺冰天雪地出世嘅企鵝BB都一樣頂唔順，要搵個特別嘅地方匿埋取暖啦～

大阪海游館最近就開心些牙咗幾張相，個個網民都大讚好打耳咁話喎！是咁的，雖然企鵝BB有少少絨毛喺身，但係呢排日本又落雪又盛，呢啲毛都未出齊嘅BB又邊夠暖呀，於是隻企鵝BB一見到個飼養員咪當正佢係老竇咁塞個頭落佢對腳度囉！

喂企鵝仔，人哋要做嘢㗎，你咁樣黐實佢，叫飼養員點捨得行開啫！唉，見你成個毛毛球咁卡娃依呢，咪畀你黐多陣啦～

你哋睇下企鵝仔畀人夾得幾冧～梗係啦，家陣有個私家暖爐喎，識取暖最唔係霸住飼養員嚟取暖？氹得飼養員開心話唔定多幾條魚食，仲可以乘機賣萌呃like，俘虜埋網民嘅心呀嘛！

不過毛毛咁精明，係唔會畀佢呃到嘅。佢扮到咁可愛肯肯定係想下次霸住靚女飼養員對腳唔放，唔好以為你咁可愛毛毛就唔知你嘅真正身份係一名腳膠嚟喎！

封面圖片及資料來源：海游館／Facebook