最近Pokemon迷真係受咗一連串嘅打擊呀，首先係同甲賀忍蛙人寵合一屈晒機嘅小智拎唔到聯盟冠軍，再睇到小智畀莎莉娜鍚完之後，同比卡超喺Sun & Moon版竟然完全崩壞！令一眾Pokemon迷真係玻璃心碎了一地呀。

唉⋯⋯新版嘅小智同比卡超真係7到連小智自己都無眼睇呀。你以為咁已經夠趕客？未算！雖然日本動畫好多時因為追期個背景會畫得冇咁靚，但係都唔係搞成咁呀？

你睇下右下角隻伊貝？真係震驚千萬Pokemon迷呀！老老77，話就話背景啫，學星爺話齋，臨時演員都係演員呀！你唔想畫咁多嘢，咪畫瞇起對眼笑咪算囉做咩要搞到人咁喎⋯⋯

連啲網民都話呢隻伊貝同大陸山寨貨有得揮呀⋯⋯其實假嘢都可以好可愛嘅，好似呢隻咁，其實咪又係扮緊伊貝～但係可愛好多囉～

咪就係呢隻百變怪伊貝囉，睇下人哋山寨得嚟幾受歡迎？下次如果想慳返啲筆畫，咪畫多幾隻百變怪落去囉～仲可以當係同啲Pokemon迷玩Where’s Ditto?！

封面圖片及資料來源：border7723／twitter、動畫《寵物小精靈Sun & Moon》截圖