【世界級創意】Ikea直接將顧客煩惱用嚟做產品名都得?

相見好就同住難,就算係最親密嘅人總係會有啲嘢係特別難頂嘅⋯⋯例如另一半打鼻鼾好似拆天咁,細佬妹啱啱出世就搶晒Fo,阿媽係地獄廚神,Balibalabilibala......真係問題天天都多呀!作為一個成功嘅傢俬公司,梗係要「用心聆聽,更知你心」,咁啲產品先多人買㗎嘛~

圖片來源:Ikea Retail Therapy

好似Ikea 咁,為咗要融入家中,特登上網Google最多人有嘅煩惱,仲改晒啲產品名做嗰啲問題,等啲客對症下藥,有咩問題就買咩咁話喎。好似呢張床,老公扯鼻鼾咪踢佢去日間床度瞓囉!

圖片來源:Ikea Retail Therapy

兄弟姊妹嘅問題就更易搞啦,細佬妹搶你Fo,你咪買返個Spotlight日日射住自己,「高溫燒滾了我」咁嘅款,包你成為全屋焦點呀!

圖片來源:Ikea Retail Therapy

如果嫌兄弟關係太疏,冇咩connection,咪買返條線駁住佢個電掣囉,係咪即刻覺得瞬間被接通呢~

圖片來源:

Yo,阿媽唔識煮飯咋嘛~使乜驚呀?正所謂,叮叮好方便,仲有粥又有麵,買部微波爐就咩都搞得掂啦!

圖片來源:Ikea Retail Therapy圖片來源:Ikea Retail Therapy

最難得Ikea冇忘記過一班失戀嘅人,一樣咁體貼佢哋嘅需要。真係一疊紙巾都有佢嘅用處呀,失戀嘅嘢開咗部電腦,用晒成疊紙巾咪冇事囉,毛毛係話開電腦Del晒啲相,跟住喊晒成疊紙巾呀!唔夠喊仲可以趁特價買多幾疊𠻹~如果之後想箍煲,買卷絲帶返去就得㗎喇,用嚟綁咩?我唔想搞大件事呀,你走啦。

圖片來源:Ikea Retail Therapy

不過點解佢淨係有 「How to Keep a Girlfriend」 冇 「How to Get a Girlfriend」㗎?分明歧視連失戀都無得失嘅單身狗啫!而家最多人嘅問題係連Girlfriend都冇呀,嗚⋯⋯Ikea 大神,有冇咩產品可以幫毒L唔使過Lonely Christmas呀⋯⋯?

 

封面圖片及資料來源:ikea retail therapy

毛記電視網站 · 版權所有 · 不得轉載 Copyright © TVMOST.COM.HK All rights reserved