接新娘嚟講，架花車就梗係要有咁型得咁型、有咁名貴得咁名貴，咁先夠威水㗎啦！不過百9幾萬一架嘅名車唔好話買吖，就算租都要使唔少錢，你哋估個個新郎哥都咁有錢㗎咩……冇名車？唔緊要～好似呢對台灣新人咁用水泥車做花車都一樣咁搶眼啫！

咩話？用水泥車做花車咁霸氣？

是咁的，話說最近有台灣網民就喺街見到一條長長嘅水泥車龍，心諗附近一定係有單大工程頂啦，唔係點會有咁多架水泥車同時出現喎！點知睇真啲，啲水泥車上面掛住咁多紅噹噹嘅氣球同絲帶嘅？原來呢條長長嘅水泥車龍係接新娘車隊嚟呀！

衰鬼吖，用水泥車嚟做花車又幾特別㗎喎！真係一架都貴過啲咩名車多多聲呀～

好彩上年呢對香港夫妻都唔弱，租咗架巴士嚟做花車啫。大家睇下架巴士上面寫住幾大個「LOVE」，真係睇見都覺得sweet！話時話，用巴士嚟做花車，咁咪多多親戚都坐得晒囉？正喎喂！

資料來源：李冠霆／爆料公社

延伸閱讀：【大大個LOVE字】巴士接新娘一樣咁Sweet