呢期喺Facebook最hit嘅，相信就係呢隻意味不明，淨係識得瘋狂揈頭嘅紫色鴿喇！有人叫佢做揈頭鴿，有人就咁叫佢紫色鴿，但其實人哋有名有姓㗎，佢芳名垃圾鴿（Trash Dove），由插畫家Syd Weiler創作，二月開始喺Facebook爆紅！無論係咩post都好啦，下面嘅留言都一定會畀呢隻垃圾鴿洗晒版！

隻垃圾鴿有咩咁吸引？唔知㗎，鍾意佢夠癲、一味揈頭、好似乜都唔使諗咁囉！台灣有個高手可能嫌平面嘅垃圾鴿唔夠好玩呀，所以就將佢實體化，用氣球扭咗隻出嚟！

個氣球本身已經扭得夠晒似鴿子㗎啦，再黐埋對大眼，真係將垃圾鴿神還原出嚟咁呀！唔得喇，忍唔住喇，come on 瘋狂揈頭啦！

雖然現實版垃圾鴿就唔似得Facebook版咁跟住個beat嚟揈，似係震過貓王多啲，不過得閒無事捉實佢嚟喪揈又真係幾減壓！唔知點解睇得耐，仲好有衝動一嘢拮爆佢?！

封面圖片、資料來源連結：廖昱閔