好多男人都叫自己架車做老婆，老婆要嚟做咩？梗係攞嚟錫啦，至於點鍚法就隨你啦。有冇人會鍚架車錫到真係咀落去？都可能有嘅，話晒老婆吖嘛⋯⋯但係要咀足50粒鐘嘅話，就算係真嘅老婆都未必得啦！

美國德洲早排就搞咗個比賽，鬥咩？鬥咀得耐呀！唓，情侶鬥Kiss得耐成日見㗎啦，但今次唔係咀個人，係咀架車喎！

嘩，成班人一齊咀落架車度，何其壯觀呀！嗱，比賽規則好簡單，咀架車咀夠50個鐘就算你贏，咁就有機會帶架車返去㗎喇～

就係咁簡單⋯⋯至奇呀！聽就易，50個鐘即係兩日有多，個嘴全程要黐住部車喎！

咁咪即係兩日不眠不休唔食唔飲，連廁所都唔去得？好易出事㗎喎！咁又未至於咁唔人道嘅，每咀一個鐘，就會有十分鐘嘅休息時間，等你飲啖水又放下水，Relax下個嘴，然後先繼續咀～

見到有啲靚女妹豬同靚仔咁咀落部車度，毛毛都好想做嗰架車呀⋯⋯

呃⋯⋯毛毛收返頭先嗰句。呢個咀咀馬拉松比賽仲要全程喺FB直播㗎，但係每節4個鐘嘅直播就淨係望住班人咀落架車度，其實有咩好睇呢？都係嗰句⋯⋯睇人＿＿係最開心嘅。

比賽開始嗰陣有20人參加，去到第二日已經得返11個人喇。但估唔到最後居然都有成7個人咀足50個鐘喎！個個參賽者都咁辛苦，不如今舖就打和啦，Super！

咪玩啦～你唔係咁天真咁傻，以為人哋會送多六架出嚟下化？官方一早遇咗會有咁嘅情況，所以喺比賽規則寫明，如果有多過一個人咀到超過50個鐘就抽籤決定得獎者㗎喇。

下，搞咗兩日，仲要睇邊個夠運？最後抽咗呢位紅衣小姐出嚟做得獎者，咁其他人咪變咗白咀50小時？唔係嘅⋯⋯都有張演唱會飛做安慰獎嘅，好過冇吖，不過而家個嘴仔咁攰，仲點跟住唱呀？

封面圖片及資料來源：FOX10Austin／Facebook、FOX10Phonix／Youtube