最近祖國嘅海軍68歲生日呀，咁好意頭，國防部梗係要喺微博出返張圖賀一賀佢，同咁多位同胞一齊熱烈地彈琴熱烈地唱啦～

睇下張poster先，大大隻字寫住「1949－2017」，嘩，唔講仲以為2017年就瓜咗柴?……啋啋啋，冇啲咁嘅事，大吉利是大吉利是！睇返啲海軍裝備吖，大大隻航空母艦，側邊就有幾隻護衛艦，細心少少睇，水底仲有個深色啲嘅影，唔係中華白海豚，係潛水艇嚟呀。上面又有幾架軍機，即係點呀？型囉，威囉，疊馬囉，英雄主義！

不過呢，有摩擦力極強嘅網民就發現，側邊隻船仔，原來係美帝嘅「聖安東尼奧級兩棲船塢運輸艦」嚟，而船頭嘅艦載機就係俄羅斯嘅「米格-35」啵！咩意思先？想話國防部亂咁P圖呀？而家世界都是中國的，海軍68歲生日咁大件事，美俄都派人嚟生日party你吹咩！

噚日國防部就出咗post道歉，承認「配圖不嚴謹」，覺得大家愛之深責之切，先會咁緊張指正佢哋喎～

金仔身邊呢位勇士成日畀啲網民笑佢係全世界最大工作壓力嘅designer，唔使擔心喎，好快強國國防部都有designer要好似你咁返工㗎喇。

封面圖片、資料來源連結：國防部發布／微博、老虎哥來了／微博