日本人叫炸腐皮做「油揚げ」，而腐皮烏冬又有個名叫「狐狸烏冬（きつねうどん）」，聽講話係因為日本傳說中嘅狐狸鍾意食腐皮，同埋啲人覺得炸腐皮嘅顏色好似狐狸毛喎⋯⋯最近，有碗出自奈良一間烏冬店嘅腐皮烏冬就喺Twitter畀日本網民瘋傳嘞！

喂，腐皮烏冬即係一碗放咗塊腐皮嘅烏冬咋嘛，有咩咁特別呀？

第二間烏冬店嘅腐皮烏冬就係就咁放咗塊腐皮喺碗烏冬上面，但呢間「麺闘庵」嘅「巾着きつね」就唔同呢～佢哋將啲烏冬收埋喺塊超巨型嘅腐皮入面，然後再用條蔥紮住佢，整到成個袋仔咁樣樣㗎！唔知啲烏冬畀腐皮包住之後有冇變得更彈牙呢？

除咗呢碗「巾着きつね」之外，「麺闘庵」仲搞咗其他新意思。嗱，話明間烏冬店係喺奈良，咁就梗係唔少得同奈良名物鹿仔crossover啦！登櫈，係有鹿仔圖案嘅腐皮呀！

唔止咁，仲連心形腐皮都有?～

喺近鐵奈良站行5分鐘，或者喺JR奈良站行15分鐘就到，諗住去奈良公園餵鹿嘅朋友仔有興趣咪試下囉。

麺闘庵

地址：奈良縣奈良市橋本町 30-1

營業時間：1100－1900（逢星期二休息）

近鉄奈良駅近くにある麺闘庵では、特注の巨大油揚げの中に、うどんが包まれた「巾着きつね」が味わえる。
まさに逆キツネうどん状態！ pic.twitter.com/sghaxvx9kZ

— まつじ (@matsujun5213) 2017年4月23日

資料來源：matsujun5213／twitter、ayase_yosiei／instagram、hidemiiin.0710／instagram

睇埋：【卡娃依呢】奈良大和郡山市一街都係金魚