【毒L識食】牛油果+豉油=三文魚刺身?!

根據調查顯示,十大香港人最鍾意post嘅相其中一位就係三文魚刺身!嗯~諗起都覺得正呀,不過聽講得多會生蟲,同埋你知啦,毒L邊有錢食咁多日本嘢呀!唔怕!今日就等毛毛教大家一個祖傳毒L食法!

平價版三文魚刺身嘅材料包括:牛油果、豉油、糖呢兩茶匙,仲有啲橙皮𠻹。

可能大家都好煩惱,到底牛油果點揀先係靚呢?好似好難分生定熟咁喎!話明祖傳秘方,毛毛係唔會教你哋睇顏色咁膚淺嘅。揀牛油果嘅時候,拎埋耳邊聽下聲,如果聽到佢話「揀我啦揀我啦」就千祈唔好買,如果冇聲呢,揀佢就啱喇。

之後就可以用鐵匙羹挖啲肉出嚟,小心唔好太為食食咗粒核呀下。


除咗牛油果,豉油都一樣好重要。識食一定係用一包包仔嗰款壽司豉油,咁先可以呃自己呃得最徹底。然後就倒出嚟當佢紅酒咁「啷」下佢,睇下夠唔夠色澤。呢個step冇乜實際意義,主要係增加些少中產生活態度咁。

基本上你已經完成呢味偽・三文魚刺身喇!記得食嘅時候要用筷子夾起啲牛油果,慢慢咁點豉油,再放佢入口。簡直好似幾十條生猛嘅三文魚喺口入面力爭上游咁fresh嘅感覺呀!咪話毛毛唔提你,一定要合埋眼先好食呀!自製假想能延續故事呀嘛!

 

【毒L識食系列】

【毒L識食】兩分鐘超簡單微波爐芝士炒蛋!

【毒L識食】其實良景宵夜有咩食㗎?

 

毛記電視網站 · 版權所有 · 不得轉載 Copyright © TVMOST.COM.HK All rights reserved