讀書嘅時候，雖然我哋會擔心突擊測驗、考試唔合格、瞓覺流口水畀人見到，但我哋更加擔心嘅係同啲老死唔同班。睇升班嗰一刻真係緊張過開六合彩，當你見到大家唔同班嘅時候，除咗即時崩潰跪地痛哭之外，就只可以接受現實。但為咗維持呢段關係，大家都會用盡辦法！

【行過課室會?下佢】

每次去第個課室上堂就係??好朋友嘅最好時機！

差唔多行到佢嗰班嘅時候，已經要去定個外欄位，以防喺茫茫人海中佢見你唔到。一經過嘅時候，就要把握嗰千份之一秒，將自己塊面哄埋個窗口，驚死佢睇你唔到，但又唔可以畀老師見到喎，真係緊張過玩「123，紅綠燈」。

明明返學、小息、食晏、放學都會見㗎啦，做乜會搞到大家好似牛郎織女咁。

【冇帶書過隔籬班借】

帶漏書並唔可怕，但帶漏咗會罰人抄嘅老師嗰堂嘅書就最可怕。
呢個時候，你終於發現原來有個FD子同你唔同班都有好處㗎！一打鐘轉堂嘅時候，你就要即刻9衝去佢班房，喺門口偷偷摸摸咁叫個老死出嚟，九秒九拎完本書，要係老師嚟到之前返埋位，扮到咩事都冇咁，坐定定喺度。唔同班嘅你哋總能夠喺緊急關頭打救對方！

【小息走廊gathering】

咁難得有自由時間，梗係要走出課室抖抖氣。
你地就算唔去小食部買嘢食、唔落球場打波踢波，都要出走廊行下企下吹下水，好好珍惜可以見面嘅時間。你哋會講下啱啱上堂嘅趣事、邊個啊Sir Miss又做咗啲?嘢、女神借咗支筆畀你……15分鐘眨下眼就過咗，你哋又要say goodbye，難離難捨咁各自各返班房，再期盼下個小息嘅來臨。

嗚呀！只係隔咗幾個班房啫，點解好似隔住個太空咁慘㗎。