有睇《星際啟示錄》嘅你一定知道，Murphy's law講出咗個鬼唔知阿媽係女人嘅大道理──凡係可能出錯嘅事都必然出錯。就以搭巴士為例，你以為擺低錢就可以舒舒服服坐低抖下？傻豬嚟嘅，每次搭車你都總會遇上以下嘅不幸事情，都會令你反思，到底搭巴士呢個決定，是錯的嗎？還是傻的嗎？

頂背杉

搭巴士畀後面條友個膝頭哥頂住背脊，猶如畀腦細鏈住春袋嘅職場哈巴狗一樣，內心怨恨萬分依然敢怒不敢言，一句講晒，諗就兇狠，做就碌L。

打機打手

究竟點解而家仲有人玩Candy Crush轉珠同Tsum Tsum？！仲要唔熄聲？！你信唔信我可以報警，告你不誠實使用電話吖嗱？呢條例乜都告得入㗎！（好似係）

唸經小組

唔理係大聲講嘢嘅中坑C9，定係刻意壓低把聲但全世界都聽到晒嘅情侶嗌交，佢哋拎起電話死唔斷氣唸西經製造煩音，睇嚟要請夢遺大師超渡亡靈先得。

飯味攻心

有人喺巴士上食M記可能你都接受到，但打開盒飯會唔會太難頂呀腦細？平時嘅飯香喺巴士上淪為隔籬飯臭，就算你幾餓都只能夠講句：「媽的！我餓，但我吃不下。」

一地都係水

巴士上總有啲契弟將罐未飲晒嘅嘢飲扔落地，結果嗰罐嘢倒瀉晒碌嚟碌去，成地黐立立之餘個個仲要縮腳趾避沙示，嗰種滑稽直迫《回魂夜》嘅練膽大法。

空氣炮

有時搭巴士，你聞唔透，你聞唔清鼻前呢一陣惡臭，到底係巴士本身嘅臭味，定係其他乘客嘅屁味，究竟呢個世界，仲有幾多嘢你係掌握到？都係索多兩啖聞清楚好過。

美人坐隔籬

一個靚人坐你隔籬，你哋最接近嘅時侯，距離只有0.01公分，你要控制住自己對眼唔好望過去，控制住自己隻手唔好掂落去……而聽講，呢種膠著嘅情況，英文係Jaded。

美人唔坐隔籬

你同上緊車嘅俊男美女有眼神接觸，就以為佢會坐你隔籬？Sor9ly，佢哋往往同個外型差你好多嘅地中海中坑或者大媽坐都唔揀你，你好失落，你好想學方進新大嗌：「腦細……畀次機會……腦細……」