今日係書展最後一日，各位買到破產未呢？但係剩係吸收書本裏面嘅知識係未夠㗎，等毛毛同你哋分享下一啲除非你知，如果唔係你肯肯定唔知嘅書展冷知識啦。

書展其實有得集郵

集郵吖嘛，你東方昇?海珠東方昇盤菜瑩子黃慘盈都集晒啦！唔係呀，唔係講呢啲集郵呀，係真係貼郵票嗰啲，咩呀？你唔知郵票係咩？唔好扮細好喎！

書展其實唔影得相
下？係呀，原來唔影得㗎。哦！你post咗書展啲集郵相上網！你拎咗影相不反對通知書未呀？唓唔影我畫囉～Sor9ly，繪圖同素描都係禁止㗎！不過佢睇唔出你畫咩嘅話應該冇事嘅。

書展其實有得抽獎

你唔知書展其實有得抽獎呢？仲要係抽iPad 2呀，不過就要你好似小學嘉年華咁攞印仔，但係抽iPad 2喎，仲要成村人都唔知有得抽喎，你仲唔快啲趁最後機會搵印仔？

書展其實有成百萬人去

成日話書展好多人好多人，到底有幾多人呀？原來上年書展有成個十百千萬十萬…成百萬人次咁多㗎，不過如果係慈母幫手數，應該七日加埋得一千人囉。

以上嘅冷知識肯肯定係真憑實據，絕對唔係子烏虛有。仲有呀，今日書展五點就完喇，快啲趁最後機會係去搵男神女神集郵啦，影相之前記得書面申請喎。

資料來源：香港書展