2015年07月21日 星期二
喺香港做牛都死
好多香港人為咗上車日日都做牛做馬做到好似隻狗咁。原來喺香港做牛都唔係咁容易，流浪嘅可能就會畀車車親，有幸畀人養嘅都要面對生活環境縮水嘅問題。
兩年前就有個樓盤話自己間房可以擺到6隻牛，講到好似好大咁。
但係今次就有個同一地段嘅樓盤話自己間房可以擺到8隻牛。
大家唔好以為努力做牛就可以細樓換大樓，毛毛已經搵咗暑假都要上數學興趣班嘅細路幫啲牛計過，其實暗藏玄機。
舊單位實用面積：1013尺，擺6隻牛，平均每隻牛有169尺用
新單位實用面積：1080尺，擺8隻牛，平均每隻牛有135尺用
你睇，過咗兩年，啲牛就冇啦啦冇咗34尺活動空間，唔知遲啲會唔會見到啲牛都因為土地問題而喺條街到啪啪啪呢，不過佢哋就應該唔識拍片嘅。
