子華神都話過，若要人不知，唔好太低B。你以為偷食真係會完全冇人知咩？其實你身邊已經有對眼望住你。毛毛個FD子就喺搭小巴嘅時候，見到個賤男偷食，用短短10分鐘，睇穿咗一個人。

是咁的，對情侶一上車，咁啱冇晒連位喎，咁佢哋就唯有隔住條走廊咁坐啦，個男嘅就坐咗毛毛FD子隔籬。雖然隔住嘅唔係奈何橋，但冇得一齊坐，相信對唔少情侶嚟講，都係好sad豬嘅。個細心嘅男朋友仲扶一扶佢女朋友先坐底?，你知啦，小巴大佬開車好快㗎嘛！

毛毛個有些少八卦嘅FD子可能悶啦，於是就昅下呢位哥仔手機玩緊乜。哥仔玩玩下facebook，突然有個叫傻豬嘅人whatsapp佢喎，而佢就覆咗3個啜啜咀emoji。睇到呢度，毛毛真係好葡萄囉，都係隔開一陣啫，使唔使咁痴纏呀！唔准呀隔空傳情呀！唔准啜啜呀！

點知，毛毛FD子再望多眼，就發現個女朋友豬當時根本冇用緊電話㗎！個哥仔仲即刻將成個對話delete咗！而女朋友就傻傻的調位去挨住男朋友膊頭…… 到底車上嘅女朋友，幾時先會知事實有幾殘酷呢？點解哥仔又要瞞住佢女朋友啜阿傻豬呢？其實，會唔會傻豬先係正室呢…… 到底，呢個世界，仲有幾多嘢係我哋掌握得到，毛毛應該用一程電車嘅時間，都望唔透……