麵包機簡直係對媽媽嚟講最偉大嘅發明，將啲麵粉呀、水呀、牛油呀乜乜乜呀溝埋一齊嚟做個包一啲都唔笨，起碼唔使畀成十蚊八蚊食個空氣包嘛，而且自己鍾意食咩款就整咩款，自由過自由神像。

不過，對一眾仔仔女女嚟講，就係最有挑戰性嘅發明喇，因為媽媽總係充滿創意，每朝都有新鮮（未見過嘅款式）麵包做早餐，可以話係鑊鑊新鮮鑊鑊甘呀！最近就有個讀者send咗個message畀毛毛，個message是咁的：

「毛毛，我媽咪一直煮野都好叻，成日自己都諗啲新菜式。

自從有咗個麵包機，佢更加沈迷左各式各樣嘅麵包。乜野香草腸仔包、法式芝士包...真係好好食，我亦終於唔洗係街買個空氣多過麵粉嘅包做早餐。

（毛毛心諗：Auntie都整得幾有水準吖，仲有埋包裝紙，其實是咪佢喺街度買返嚟㗎！）

直至有一個朝早，我一起身就見到呢個包係枱面.....我第一個反應真係呆_咗，究竟我媽咪又創作咗啲咩出黎....

由佢顏色話我知,佢唔係腸仔...潤腸？！帶點軟而又癡立嘅texture話我知佢唔會係。結果，身為孝子嘅我鼓起最大勇氣食左一啖...嗯，好冧，暖嘅....開估，係原條香蕉麵包。媽咪仲話佢今次搞搞新意思，落足料，唔想好似街啲香蕉蛋糕咁淨係落香精。

註: 嗯，個朝我怱怱係屋企食左佢就算，因為我唔敢拎返公司俾同事見到我食啲咩」

55，連新鮮蕉蕉包都畀Auntie諗到，呢位讀者有個對麵包都咁執著咁有研究嘅媽媽，毛毛係不會去羡慕不會去妒忌的，嗚呀！

延伸閱讀：【老母地獄廚房】清蒸酒樓炸春卷、【老母地獄廚房續集】母親的幽默料理圖集上篇、【老母地獄廚房續集】母親的幽默料理圖集下篇