呢期香港真係好陌生，好似變咗另一個地方咁，因為，實在太多騙案。

慈母見咁多新型騙案，就用SMS溫韾地提示各位孝子與不孝子小心電話騙案，不過好可惜，香港人連呢個咁溫暖人心嘅message都唔敢相信。

今日又有讀者收到疑似慈母寄出嘅信喇，封信寫得好扼要，連招呼都冇打，開門見山咁叫佢同油尖區反黑組嘅何幫辦聯絡。讀者話封信就係得一頁咁多，冇夾住其他紙嘅，唔通何幫辦有急事用飛鴿傳書寄，為咗隻鴿可以慳啲力水所以盡量一張紙寫晒？

毛毛search過封信上面個電話，真係油尖區反黑組個冧巴嚟㗎！媽！好亂呀，到底係騙徒扮慈母？定其實係慈母扮騙徒扮慈母呀？定其實⋯⋯毛毛喺度呼籲，任何人士有呢單疑似騙案嘅消息，請盡快與十八區花生組第柒隊毛孩聯絡。