毛毛豬相信，已經冇嘢可以阻止到世人發明唔同味道嘅雪糕！好似最近就有隻玩命雪糕新推出呀！

你以為可以加落甜品，又係綠色嘅，就一定係綠茶？少年你太年輕了。呢杯係山葵雪糕（$35），山葵即係wasabi呀！老細仲話啲wasabi係即叫即磨，夠晒新鮮同⋯⋯攻鼻呀！毛毛豬本住玩命嘅心態，會一會你先！

食落真係有新鮮wasabi嘅天然鹹味，亦都冇想像中咁攻鼻嘅⋯⋯一開始嗰陣。之但係，慢慢你就會feel到啲wasabi愈嚟愈辣、愈嚟愈辣！呢個時候食返啖雲喱拿雪糕，中和返吓，又可以繼續挑機喇～。

另外，毛毛豬見到呢隻淺藍色嘅波子汽水味雪糕（$38），個樣幾靚咁，又忍唔住叫多咗杯嚟試～

嗯，係有波子汽水味嘅，不過都有啲似細細個成日食嘅吹波膠味......都係一種特別嘅嘗試嚟嘅。

你哋唔好再同我講咩雪糕好肥乜乜乜咁，畀我唞吓得唔得啫！唞完咪去減囉！嗚嗚。

餐廳資料：

Check In Tokyo

地址：旺角登打士街43P-43S號地下9B號舖

營業時間：星期一至日: 12:00-23:00