睇完芝士學堂條片，好似同一班老朋友隔世重逢咁，明明已經過咗咁多年，點解佢哋好似冇老到咁嘅？唔知佢嘅而家做緊咩呢，好耐冇見喇，文仔哥哥呀，你而家點呀？

文仔哥哥原來今年已經42歲喇，佢原名叫做伍文生，幾年前淡出咗幕前，而家做緊飲食生意，開咗兩間餐廳，曾經移民過去澳洲，又返返嚟香港，而家仲有做婚禮司儀。喺毛毛嘅記憶入面佢都係著住套校服，不過原來而家佢已經做咗人老豆，有3個仔女喇（囡囡同文仔哥哥一樣樣嘅喂）。



講到做兒童節目，文仔哥哥話佢好開心，好鍾意同小朋友玩，毛毛聽得出佢真係好鍾意做兒童節目㗎！唔知你有冇睇過佢嘅《文仔偵緝檔案》呢？文仔哥哥話做兒童節目好似延續咗自己嘅童年回憶咁，因為佢自己本人都係睇《芝士學堂》大㗎！佢係《芝士學堂》第六代嘅演員，自己做返細細個睇嘅兒童節目就好似跳返入去自己嘅回憶度咁，個感覺真係好神奇。

令文仔哥哥最感動嘅係，文仔哥哥而家做司儀嗰時會有好多人捉住佢影相，話見到文仔哥哥就好似見到自己嘅童年咁，開心到笑到變返個細路。雖然文仔哥哥已經好耐冇做兒童節目主持人，但係呢個身份已經永遠喺一代人嘅童年回憶入面。文仔哥哥話做兒童節好有得著，因為呢個身份令佢得到嗰份演員們珍而重之嘅認同，「做一個演員，有人認同你，覺得你喺回憶入面係重要，係一件好開心嘅事。」佢仲話冇做幕前咁耐，今次可以喺毛記電視重演返《芝士學堂》真係好開心。

香港地有好多唔同嘅演員做過數唔盡嘅角色，但係有一個好難得嘅角色係所有人都唔會忘記，呢個角色叫做「童年回憶」，我哋諗返起都會會心微笑，多謝你呀文仔哥哥。