「屎～我係～一督屎～～～」啲人成日話一朵鮮花插在牛屎上，面對女神，毛毛覺得自己就係女神腳下嗰督牛屎......不過喺印度，就算係牛屎，都好搶手！

唔係講笑，啲屎真係有價有市㗎！你睇下呢set色澤咁啞緻嘅屎餅，一set 3嚿都係189盧比咋，即係22蚊港紙左右（好似係，除非唔係），仲有免費送貨，幾方便吖～

呢位喬寶寶同鄉頭上面嘅，冇錯，就係一督督新鮮製造嘅牛屎喇～佢哋通常都會用嚟生火、取暖、煮嘢食或者儀式～仲有啲住喺城市嘅喬寶寶會專登買啲牛屎返屋企，回味農村味道！喺印度教傳統排燈節（Diwali）期間，仲會供不應求賣斷市！等毛毛都喺新界執返幾嚿香港本土鮮製牛屎擺上網賣，發達不是夢喇！！
呢粒咁文青嘅金字塔狀物，其實都係一督牛屎嚟！只要點著呢督有啲似三角朱古力嘅屎，就可以驅蚊㗎喇～所以話，就算一張廁紙、一條底褲，都有佢嘅價值，牛屎都一樣！毛毛突然覺得，人生充滿希望！

封面圖片來源：phys.org、gizbot
圖片及資料來源：gizbot、AFP、NRI 滋擾分解研究所