卡卡卡～碌碌碌！係咪隔住個mon都覺得有聲呢～毛毛唔係傻咗，呢啲係扭蛋機嘅聲嚟囉！咪唔認呀，就算咁大個人喇，見到扭蛋機都想扭返幾下㗎，係咪先？如果屋企有部扭蛋機，仲唔日扭夜扭？

喺屋企擺部扭蛋機呢啲咁爽歪歪嘅事，都係FF嚟嘅啫。點知對台灣一個屋企嘅小妹妹嚟講，竟然係現實囉！皆因佢哋老竇親手整咗部扭蛋機佢哋歎呀！

呢個廿四孝老竇呀，日日11點先放工，一返到屋企就砌足兩三個鐘，用咗成個星期去整部扭蛋機出嚟。

雖然部機嘅表面上只係用紙皮拼拼埋埋，無咩修飾，但入面個餡就勁嘢喇，扭落去嗰下都唔知幾順～個老竇自己都話要邊扮工邊諗點整㗎。妹妹佢哋收到呢份禮都超開心，仲學埋點用錢同排隊?～老竇好嘢！

話唔定台灣啲老竇特別犀利，好似呢位就為咗仔仔，整咗毛毛嘅dream toy出嚟......

係呀，咁多位老竇有冇興趣收返個契仔咁呀？

封面圖片來源：廖柏筌/youtube

資料來源：廖柏筌/youtube、Ettoday、mypaper