最近，喺台灣一個網民屋企，發生咗一單離奇命案，毛記葵青區總冏司喺度向大家作出呼籲，請目擊者向我哋提供線索。

死者係一條四腳蛇，身上冇証明文件，不過冏方根據佢嘅死狀分析，懷疑佢就係著名嘅四腳Laughing Gor，並且推斷佢係爬上書架期間突然電話響，一手接電話一手捉實書架，咁啱當時風勢猛烈，將佢身體吹至僵硬，於是以呢個百年難得一見嘅姿態死去。四腳Laughing Gor，R.I.P.。

另外，冏方亦希望藉住呢個機會，向各位報告另一單命案。

日本發生集體死亡案件，而案中三名死者係來自同一家庭嘅香蕉，佢哋嘅屍體被懸掛樑上，表面睇嚟係集體上吊自殺。但冏方追查後發現，三名死者雙腳仍然貼住地面，因此唔排除「被自殺」嘅可能性。根據香蕉身上嘅屍斑數量同面積推測，死者應該已經死去大約三日。

以上兩宗屍體發現案疑點重重，毛記葵青區總冏司再次呼籲，任何人士如果有任何關於呢兩單命案嘅資料，歡迎同我哋聯絡，電話係，689，55699。

封面圖片來源：●【爆廢公社】●

資料來源：●【爆廢公社】●、miyuki_kog/ twitter