落雨真係好煩，落雨要排隊等巴士真係好煩，落雨嘅時候上巴士嗰一刻要捉到個timing收遮仲煩！如果唔使自己擔遮，你話幾好呢！

最近毛毛收到幾個讀者腥相嚟，都係大讚同一個暖男哥哥呀！話說沙田濱景花園巴士站一到放工時間就會勁多人等車，所以不時都會有巴士職員去睇場嘅。而讀者排緊嗰條隊，就因為太多人擔遮喇，搞到後面啲人睇唔清楚幾多號巴士，相入面呢個職員哥哥就係咁大大聲嗌畀後面知呢架係幾多號巴士。

唔止咁呀，最warm嘅係佢仲幫上緊車嘅乘客擔遮，等佢哋可以喺佢溫柔又強壯嘅臂彎下面收起自己把遮先上車，唔使咁狼狽呀嘛～咁細心，抵你係咁畀人讚嘅！喂呀有冇人識呢位哥哥呀，求介紹呀！