喂呀，黐線㗎，冇陰公呀！！！美國有班科學家捉咗啲猩猩做啲好痛苦嘅實驗，做完之後仲要扔佢地去一個荒島度，點知隻猩猩冇對人類懷恨在心，依然對人類好友善.....

呢隻叫做Ponso嘅猩猩同佢好多隻同類畀人由大自然捉咗去實驗室去做肝炎實驗，做咗好多年實驗之後班科學家就將呢20隻猩猩扔去冇天然糧食嘅非洲荒島上面自生自滅。

實驗中心耐唔耐會扔啲糧食去荒島上面，但係因為適應唔到環境，其他畀實驗中心扔出嚟嘅猩猩都死晒，佢好有靈性咁親手用泥土埋過咗身嘅同伴，而家全個島得返佢一隻猩猩，嗚呀，仲孤獨過毛毛呀陰公。

島上面嘅村民見Ponso咁慘都有接濟佢，不過實驗中心最近就宣佈唔會再送食物畀佢，有網民發起咗個SOS PONSO行動為佢籌款，當有人去呢個島探Ponso嘅時候，Ponso見到人類仲好熱情咁抱抱，人類又折磨佢又遺棄佢咁衰你都冇憎我哋，係世人對你唔住呀Ponso。

其實啲實驗動物已經為咗人類受咗多苦，做完實驗可唔可以至少畀佢哋可以安享晚年啫？如果毛毛屋企有位都好想領養佢呀，咁Ponso同毛毛都從此不再孤單喇......

圖片來源：metro.co.uk、SOS PONSO