蘊藏住星之力量嘅鎖匙，請起我面前顯示你嘅力量，契約之下，小櫻命令你立即，解．除．封．印！雖然已經好耐好耐冇喺電視睇過小櫻，但係而家隔住個mon，都覺得好似小櫻喺毛毛耳仔邊講嘢咁呀！

毛毛真係好懷念以前一放學就飛返屋企掉低個書包坐定定睇小櫻同基路仔收卡嘅日子呀！嗚呀！

唔經唔覺，原來今年唔止係寵物小精靈20週年，都係百變小櫻20週年呀！啱啱發售嘅《なかよし》4月號就宣佈，為咗慶祝呢件盛事，所以會推出百變小櫻新連載呀！不過就唔係長期連載，而係短篇漫畫～由2000年冇得睇新小櫻漫畫之後又有得睇返，其實都已經夠晒興奮啦，理得佢長定短啫！

話明百變嘛，毛毛淨係睇小櫻啲衫已經可以丁成日！雖然小櫻著咩都咁可愛，不過毛毛最欣賞就係呢個旗袍look喇，佢真係毛毛女神呀！毛毛又有返人生希望喇，希望可以快啲睇到新作啦yeah！

封面圖片、資料來源：nakayosi.kodansha.co.jp