1995年嘅攻殼機動隊入面用咗當時嘅香港街道做背景，二十年後有位cosplayer想留底呢啲舊香港景色，於是呢位叫Yui嘅cosplayer就影咗呢一輯相。

攻殼機動隊嘅背景參考咗當年香港嘅好多地方，例如石板街、旺角、九龍城寨，出現過電車、巴士同竹棚，今次佢就cosplay草薙素子去返呢啲地方影相。

呢輯相嘅攝影師係一個台灣人嚟㗎，佢話佢好鍾意老香港嘅風貌，而佢影底嘅就係佢心目中嘅香港印象。





呢輯cosplay相喺一日入面影晒香港嘅日常同夜景，真係影得好靚，靚到毛毛唔知點解睇睇下睇睇下有啲眼濕濕。


毛毛同佢講啲相真係影得好正呀喂，Yui就話，影呢啲相其實唔難，不過多幾年想再影就可能難啲喇......

又係，再過多幾年想喺香港街拍可能全部得返領滙金舖藥房連鎖店做背景，喺香港想睇返呢種香港景色，可能要睇返日本動畫先有喇。

圖片來源：Ghost in the Shell (1995) HD TRAILER
相片來源及受訪者：Yui