平時返工，最怕就係見到枱面無啦啦多咗幾張memo，因為九成都係寫住「呢份copy十份」、「4點meeting」呢啲點你做嘢嘅order……你唔係以為會有女同事偷偷地寫張「happy friday：）」畀你下話？發夢冇咁早啦！不過如果啲memo係好似紐約呢班打工仔咁用又唔怕啵！

最開頭呢，就有條友食飽飯冇sss屙，無無聊聊咁喺office玻璃窗用memo貼咗個Hi字。正所謂嘢可以亂食，人唔可以亂hi，對面樓嘅打工仔見到之後，就喺玻璃窗貼返啲嘢反擊喇！一場Memo大戰就咁開始！START GAME！咇！

聽講嗰條街有唔少廣告公司，大家創意人，出得嚟行，預咗要玩，所以就有唔少office都加入戰團，瘋狂咁貼memo喇！

唔止貼字咁小兒科㗎，連蜘蛛俠呀Simpsons呀Angry Bird呀都有，高手果然在民間！

不過講到最強嘅神人，都係呢間公司喇！用咗足足6層樓慢慢砌，再整做影片！嗱，去片！

人返工毛毛返工，點解毛毛返得咁……算啦都係唔講住喇，啱啱又收到張memo叫毛毛今日OT寫多幾份稿……

封面圖片、資料來源：boredpanda