嚟喇嚟喇，見到自己每日都好似做咗海底奇兵咁濕L晒，毛毛終於都feel到夏天嚟喇！不過毛毛出咗名靠個樣嚟搵食㗎嘛，陣間曬傷唔靚仔咁點算喎！古乳有暈，高手在民間，就等毛毛跟咁多位民間大師學下嘢先！

首先係入門級數，自己帶定條絲巾同膠紙，坐車時黐喺車窗，行路時……黐喺自己塊面，既方便又快捷，亦都唔怕其他人見到你個靚仔樣而葡萄。

跟住落嚟就係進階版。你需要嘅係一塊大葉，聽講龍貓用開嗰塊嘅遮陰能力最高，大家不妨可以試下問龍貓借，但因為龍貓神出鬼沒嘅關係都比較難搵，所以難度會高少少。

到咗最後嘅高階版喇。嗱呢個階段係需要你有少少功夫嘅底子嘅，好似鐵頭功呀、如來神掌呀呢啲都唔使毛毛多講㗎喇。只要你識功夫，瞓醒之後一嘢頂住張床褥出街，行行街眼瞓又可以即刻瞓落去，到時你仲唔係人生贏家！講明先呀，呢個阿叔識功夫先可以咁做咋，廢青唔好亂學呀知唔知！

圖片來源、資料來源：陳欣霓