愛情呢樣嘢，就好似撞鬼咁，要嚟嘅時候就自然會嚟，可惜毛毛咁耐以嚟，無論左眼定右眼，都從未撞過鬼！其實毛毛自問條件真係唔多，係人就得㗎喇，咩五十路六十路咁樣都完全ok，就好似呢位17歲嘅英國男仔咁，年齡輕輕就已經知道老藕營養價值高啦！

話說本來呢位71歲嘅Almeda Errell又死老公，又死埋個仔，真係好慘！但上天為你關咗一道門，一定會為你開返個窗嘅！就喺佢個仔嘅葬禮度，佢就遇上咗佢人生嘅第二春，佢媳婦嘅17歲姨甥Gary Hardwick！

咪睇佢成面唏噓嘅鬚根呀，查實佢仲後生過毛毛，17歲，卜卜脆，Almeda認真識食喎！而命運嘅安排就係咁玄，咁啱Gary開始覺得77歲嘅女朋友管得佢太嚴，於是就狠飛咗佢個ex，同咗Almeda一齊！

兩個人拍咗兩個禮拜之後就已經認定咗對方，仲即刻閃婚?！嘩，仲唔係真愛？呢個故事雖然講唔出咩大道理，但就好有親切感，佢話咗畀世人聽一個定律，男人都係鍾意嫩口嘅！

封面圖片、資料及圖片來源：鏡報