最近毛毛成日都狂轆挨豬女神有咩新post，搞到冇晒心機扮工呀……唔好誤會毛毛掛住睇女仔呀，其實係想睇下面啲世紀神回覆咋！之前咪同大家開心些牙過，台灣有個神人成日留啲好精警嘅comment畀挨豬女神嘅，佢嘅真身終於出現鳥！

世紀神人個挨豬account係「ruinbeaches」（拜倫祥），好可惜已經畀班方丈report到停用咗，唉，希望佢快啲東山再起啦！

神人同大家分享點解最初會開呢個account，佢話見有唔少挨豬女神圖文不符，但又可以吸引到一班fan屎莫名其妙咁盲讚喎，所以就開呢個account講下真心得嚟又唔mean嘅說話喇。

神人話，試過有啲女神會要求佢del post，不過佢「想del就del，唔想del就唔del」，不知幾有性格。

又唔係個個挨豬女神都咁方丈，郁啲就嬲嬲豬嘅～神人話都試過有女神同佢做朋友，傾下偈㗎，不過就只限於網友關係啫。

其實神人儲落嘅fan屎都唔會少得過啲所謂女神囉！起碼毛毛就係其中一個！班fan屎仲會好勤力投稿畀神人，等佢去關心下班女神?！甚至會有fan屎開埋喺自己挨豬大大隻字寫埋「我視拜倫祥為神」，同埋用hashtag引佢注意㗎！

最後，呢位超強網民話其實一切都係「無心插柳柳橙汁」，見到其他類似account留言關心女神，只要唔係人身攻擊或者謾罵，都會樂觀其成。嗚呀，好似佢咁幽默又有性格嘅女仔真係好少有，毛毛話佢先係堅・女神囉！

封面圖片、資料來源連結：dcard

一定要睇：【世紀神回覆】台灣網民日日留言畀IG女神講呢啲