喺香港，每座古舊嘅建築都有佢嘅都市傳說。連你間小學個操場都曾經係亂葬岡。
白城牆、十字架、圓拱窗，薄扶林144號，近薄扶林水塘位置，屹立一座城堡古建築。一百五十五年歷史，埋藏喺白色嘅高牆之內。
白色嘅城牆唔足以遮蓋紅色嘅歷史。曾經遭受日軍佔領嘅歷史，到今日仲留有痕跡。
【薄扶林144號】
1941年，第二次世界大戰香港淪陷，進入為期三年零八個月嘅日佔時期。呢座古堡，都逃唔出佔領嘅命運。
相傳，當年日本軍喺巴黎外方傳教會傳教士手上，奪取呢座古堡，並且喺到建立日本憲兵總部。
日軍殘害戰俘，將佢哋吊死喺城堡外圍嘅其中一棵樹上面，等佢哋死咗再拉入城堡地下層最大嘅一間房擺放。
事後呢到陰氣好重，有傳聞就話喺當日停屍間同吊頸樹之間，起咗一道三米擋鬼閘，就係因為要擋住積聚嘅怨氣。
英國商人城堡、傳教士修道院、日佔時期日軍基地，曾經喺呢到出現過。
但今日，呢座至陰嘅鬼城堡，遇上一班至陽嘅男生Castler。
但而家，呢座城堡叫做「大學堂」。
【古堡變宿舍】
由1954年開始，香港大學收購咗呢個地方，古堡就變成咗香港大學大學堂嘅宿舍。
城堡裡面嘅呢班港大男生，就開始咗喺古堡嘅生活，仲以Castler堡民自居。
面對血腥、恐怖嘅歷史，佢哋不但泰然咁喺呢到生活，竟然仲敢喺呢個充滿恐怖故事嘅歷史古蹟搞萬聖節Halloween Party。每逢十月，將古堡搖身一變，裝飾成鬼屋，招呼各位。
城堡嘅氛圍，配上悉心嘅裝飾，造就咗一間成功嘅鬼屋。
二十幾年間，每年嘅十月尾，呢到都會變成一間唔同主題嘅鬼屋。
呢到曾經變成荒廢嘅精神病院、變成靈堂、變成惡靈基地。
今年呢到更加變成一個邪教教壇，演出一套聖母轉生嘅恐怖故事。
【萬聖節嚇鬼死人】
喺前年嘅萬聖節晚上，真係曾經發生過駭人嘅嚇人事件，有參觀者就喺呢到「疑似」撞嘢。
住喺到嘅堂友覆述，當晚鬼屋一切正常，參觀人士都好高興。
到咗鬼屋完結，大家舉行after party嘅時候，有一位參觀者竟然好開心咁同工作人員講⋯⋯
「你哋鬼屋怖置得好好呀，尤其是樓上有一間房，一個扮日本女鬼嘅演員扮得好似。」
工作人員當時粒聲都唔敢出，因為佢哋知道，當晚嘅呢個時段，喺冇安排過女演員扮鬼。
而參觀者口中扮得好似嘅女演員，只喺一張加工過嘅日本女明星poster。
又有堂友指，曾經喺Common Room（昔日停屍間位置）工作嘅時候，感覺到身後嘅萬聖節裝飾假人頭好似望實佢咁，令佢好唔自在⋯⋯
喺呢個咁陰森恐怖嘅古堡裡面扮鬼，都唔知係嚇人定嚇自己喇⋯⋯
【綠地氈之迷】
除咗萬聖節，其實仲有啲貼身啲嘅故事。
相傳喺好多年前，有兩位同房兄弟，一位讀醫、一位讀工程，感情friend過打band。
眾所9知，醫科仔好L多書溫，所以佢地兩個雖然同房，但都唔係好得閒傾偈嘅。而佢哋兩個嘅傾偈方法呢，就係喺書檯面用Post-in貼紙仔喇。
有一晚工程仔收到醫科仔嘅一個留言，問佢：「我可唔可以問你借啲嘢。」
一世人兩兄弟，使嘢緊係無問題。所以工程仔就覆返佢：「借，借乜都借呀。」
第二日，工程仔又收到留言，話：「真係乜都借？」
男人就最唔鍾意畀人質疑㗎喇，尤其係工程師?，所以工程仔又回佢：「係，乜L都會借！」
就係嗰嗰晚上，醫科仔兩眼通紅咁捉住啱啱喺學校做完實驗返黎嘅工程仔，大叫：「我想借你個腦嚟記嘢呀！」
講完，就一手拎住手術刀，一手將工程仔嘅腦割咗落黎。
事後，間房地板嘅血跡就洗極都唔甩，最後更加要舖上地氈去覆蓋被血染污嘅地板。
【大男人】
環境、歷史都賦與過去種種傳聞一個滋長嘅機會。但到底喺口耳相傳、以訛傳訛定真有其事，已經無從䅲巧。
而到底點解呢到嘅宿生，對呢啲傳聞一啲都唔生畏？講到底，都係兄弟。
一個人當然會怕，但一班人，就乜都唔怕。
除咗深信啲「嘢」唔會搞喺到住嘅自己人，佢哋更相信大學堂嘅意義並唔係只係鬼屋古堡咁簡單。
堡民選擇相信、尊重、傳承呢種故事。
但喺佢哋心目中，最有價值嘅始終係大學堂呢到嘅前人留落嚟嘅痕跡。
【Halloween Party 2016】
另外，毛毛聽聞萬聖節活動有對外開放，但主要都係畀港大學生參加。如果各位膽生毛，不妨留意吓呢班古堡男孩。
如果冇咩事，毛毛都係出返去定驚先喇。
