打風唔好叫外賣，三歲細路仔都知啦。你可能會問：「但係打風，我又肚餓，點算呀毛毛？」

古乳都有暈：「自己的事自己做，自己的飯自己煮。」

毛毛緊貼風勢，為大家介紹幾款居家旅行打風必備嘅最佳劣食。大家趁出面未橫風橫雨就好去超級市場買定喇～

最佳劣食推介，入圍包括：

一、港式部隊鍋

懶，係原罪；但懶，後面通常都會跟個醒字。好合理呀，要識練精學懶，首先就要醒。

將有嘢扔落滾水到一鑊熟，烏冬、芝士腸、冰鮮丸類、水餃，煮完再加少少豉油，搖身一變成為港式部隊鍋。

五分鐘食得Perfect池！

二、清蒸雞中翼

雞翼嚟講呢，最好揀啲細隻啲嘅，解凍之後直接放上爐頭隔水蒸。

蒸完出嚟，隔走啲雞翼嘅雪水，擠多半茶匙芝麻醬。

嗱，唔好望個碟，雞翼食落口啖啖肉，包保一定有雞味呀！

三、芝士撈麵

將世界上最好食嘅撈麵，配上夾乜食物都掂嘅芝士，好味指數並唔係一加一咁簡單！

食過，返唔到轉頭！

四、豆豉鯪魚

罐頭，打風必備。喺八號風球下，手持一個好罐頭，甚至可以呼風喚雨！

揀罐頭，尤其是揀魚類罐頭，一定要睇出產日期。最好揀出產日期同今日日期相差介符三十日至九十日嘅罐頭。

咁樣罐頭入面嘅豆豉先有足夠嘅時間，同魚肉產生味覺分子交換過程（簡稱入味）。

五、茶碗叮

茶碗叮嘅預備時間比較長，所以毛毛而家長話短說，畀多啲時間大十家去入定貨。

攞個杯，打隻蛋，加啲料，小蟹柳，鮮冬菇。

再加湯，攪勻佢，微波爐，三分鐘，好簡單。

學識咗幾款唔同種類嘅最佳劣食，食唔食即刻想試下煮呢。係既話，收工後、打八號前，記得去買定餸喇～