古乳有暈，你不愛競爭，競爭也會找上你。你以為做緊嘅嘢無可能比賽到？少年人，你太年輕了。 而家連掘墳墓都有得比賽，世界上已經無嘢可以再阻止人類嘅競爭因子啦！

你睇吓比賽一開始，大家起勢咁掘，簡直好似係想掘到落地心咁呀。你睇吓個戰況，完全係「讓泥土飛」，就知有幾激啦！你唔係以為比賽咁易蠃，求其鬥快掘個最深嘅窿就得吓化。叫得比賽梗係連個窿都有嚴格規定啦。

每個窿要2米長、0.9米闊、1.5米深，除咗要快，仲要望起上嚟夠四正，至於點叫四正就靠人大……唔好意思，我指裁判決定先啱。掘完仲要跟手埋返佢，都幾考體力㗎。今年有大概15隊參加隊伍，每個參加隊伍有兩個組員，個個都係高手中嘅高手高手高高手嚟㗎，唔信？你睇！

你睇呢位仁兄紥嗰個馬就知道佢下盤功夫了得，食過吓夜粥啦。睇佢嗰甫士，莫非佢施展緊失傳已久嘅打狗棍法？

好可惜，識功夫笨唔係大晒嘅。最後贏咗嘅係呢對有成15年經驗掘窿嘅斯洛伐克孖寶兄弟，佢哋只係用咗50分鐘就掘好嘅個咁靚仔嘅窿喇！果然係駛出真功夫，方為大師傅！ 

輸咗都唔使喊嘅，你由得啲泥土Rest in Pieces 啦～其實呢個掘墳墓比賽係國際殯葬及火化服務展覽嘅一部分，主辦單位話因為斯洛伐克嘅土地問題，所有墳墓都要用人手掘，而呢班師傅落雪不怕，落雨也不怕咁日掘夜掘咁辛苦，所以大會就想透過呢個比賽表揚吓佢哋喇！計毛毛話，無論做咩職業，只要夠professional，都係咁值得人尊敬㗎～你話係咪呀哈姆太郎？

封面圖片及資料來源：路透社、Spectator