棉花糖呢家嘢，其實咪又得個甜字，仲會到成手黐笠笠，不過妹豬就係貪佢又得意又色彩繽紛，影相夠晒靚呀嘛～出街買嘅棉花糖十幾蚊支，明知佢係砂糖但都要照科水，真係有啲做咗水魚嘅感覺。好彩而家有D.I.Y.棉花糖機，咁就可以自己整啦！

日本有個網民就買咗包糖諗住自己D.I.Y.棉花糖喇，包糖九彩咁嘅色，整出嚟嘅棉花糖一定好夢幻啫！話唔定拎出去賣仲可以發大達?呀！

開著部棉花糖機，拎住支棍仔轉呀轉，啲糖慢慢變成蜘蛛網，再捲呀捲，棉花糖就出世喇！咦，不過，點解，咁嘅色嘅喂？說好的七彩夢幻棉花糖呢？而家灰色一大嚿，唔講仲以為係蟲繭喎……

相信大家小學上常識堂都試過喺張圓形卡紙上面油滿七彩顏色，再用支筆插住中間用力一轉，張卡紙就會變咗全白色！原來唔止卡紙呀，呢排好興嘅漸層飲品都一樣，好地地嘅時候就係靚靚彩色……

點知只要搖一搖，就會變咗石灰水咁樣樣……嗯嗯，其實都幾夢幻呀，人哋話夢入面睇到嘅嘢係冇顏色㗎，乜你冇聽過咩？

カラフルな綿飴つくろうとしたのにゴミボコリできたwwwwwwwwwwww pic.twitter.com/PEJqMVPBy5

— 菩薩系女子めい子 (@meiminn) November 11, 2016

封面圖片、資料來源連結：meiminn／twitter、yuluo／PTT

延伸閱讀：【說好的漸層呢】呢杯明明就係石灰水！