陪你去看流星雨落在這地球上～聽講最近有得睇獅子座流星雨喎，但做打工仔嘅唔使OT都偷笑啦，仲話睇流星雨？傻的嗎！而台灣就有位傻的妹豬真係走咗去睇流星雨，雖然結果都係咩都睇唔到，但就喺佢睇唔到流星雨好灰9嘅時候，佢老竇竟然send咗張星夜照畀佢，話喺屋企都睇到？！

果然世上只有爸爸好，見個女特登出去都睇唔到流星，除咗瘋狂恥笑佢，都不忘補返張屋企拍攝嘅高汁星空相嚟氹返囡囡。阿女又係傻豬嚟嘅，屋企有個咁靚嘅星空睇，仲使咩四圍撲吖～不過咁，點解啲星星好似咁熟口面嘅……

阿女都諗唔明，究竟屋企邊樹可以睇到咁粒粒分明嘅星空呢？唔通老竇咁潮識PS？

於是老竇好霸氣咁send咗個答案畀佢。呢片咁熟悉嘅星空，竟然係屋企隻平底鑊呀！估唔到宇宙嘅奧秘原來一直都喺廚房，呢位老竇咁都留意到，真係平底鑊都被你看透了～喂，邊個噚日睇唔到流星雨？而家返廚房睇都未遲喎！

封面圖片、資料來源：dcard