毛毛以為淨係7事先會抹極都抹唔走，點知原來連白板上面嘅字都一樣，係擦極都擦唔甩㗎喎！唔L係呀，乜白板上面嘅字有咁難抹咩？

是咁的，話說最近有位日本網民就話，呢排佢公司買咗塊新白板，不過塊唔知係塊白板嘅問題吖，定係支筆嘅問題呢？唔出盡奶力都擦唔走寫上去嘅字，搞到社長次次開完會都要抹一大輪塊白板先乾淨！而抹咗一個星期之後，社長覺得咁樣抹落去真係唔係辦法……唔通要嘥錢買過塊咁唔環保？

最後，社長發現塊白板之所以咁難用，原來係因為佢一路都唔記得搣貼喺白板上面嘅保護膠紙……嗯，呢個故事教訓大家，唔怕豬一樣嘅隊友，只怕豬一樣嘅……咳咳，冇咩事嘅話，毛毛都係返出去高呼「社長英明」先～社長英明！社長英明！

資料來源：TOSYO_PR／twitter