正所謂自己罐罐自己賺，而家啲奴才人工又低又要OT，連主子都睇唔過眼，要自己出手喇喵～好彩主子有明星相，大把人爭住搵佢拍戲呀。畀個機會你個貓奴幫吓手拍吓劇照，最多影完賞賜你親吻朕嘅肉球喇～

Oh～My Love～我的罐～I Hunger For Your Food~ 呢齣咪 Go~s~切～《人貓情未了》？你睇吓主子同奴才呢吓深情對望，就知呢套係一套可歌可泣嘅貓奴故事喇！

介紹返，跟住落嚟係翻拍嘅經典驚悚片，由大名鼎鼎嘅驚慄大師史提芬・驚嘅名著改編，《貓閃靈》！唔畀飽飯主子食，就算你匿到落天腳底，佢都會搵你出嚟！

然後就等主子帶大家衝出宇宙，睇吓呢套低成本科幻恐怖鉅製－《異喵》！一但選中你做貓奴，喵星人就會寄生喺你生命裡面，隨時破衫而出呀喵！究竟貓奴啲衫可唔可以逃過一刧，安全過渡到下一季呢？敬請切勿留意！

睇完啲咁緊張刺激嘅電影，梗係要睇返啲溫馨小品嚟Balance吓啦～ 毛毛誠意推介，本年度聖誕合貓歡電影－《ET喵星人》！平凡嘅男主角，要帶住來自喵星嘅外星人逃過一眾貓癡同愛協嘅追捕，務求將主子送返屋企！

以上電影將唔會喺地球上映，但係喵星人嘅銀色舞台又點會咁快落幕呢？如果主子要拍，貓奴就算粉身碎骨，都要拍到主子拎到奧斯卡最佳喵主角啦～

封面圖片及資料來源：moviecats/Instagram、 spotlight-media.jp