等咗咁耐，冬天終於嚟喇！天氣咁凍就梗係袋返個暖包喺身㗎啦，開講都有話「揸實暖包，就永冇甩拖」吖嘛！而呢位日本網民都唔例外，臨出門口都袋返個暖包傍身喎～

不過話時話，明明平時啲暖包揸幾揸就識發熱㗎，點解呢個暖包揸咁耐都仲係咁凍嘅？唔通個暖包係假貨嚟？之但係佢又冇爆炸吖，而且聞落仲有陣陣茶葉嘅香味?……嗯！冇錯，因為呢個真係一個茶包嚟……

原來呢位網民一直都當咗個茶包係暖包咁拎出街呀！

btw，講到「傻傻分不清」呢家嘢，呢位台灣妹豬先佼佼者～事關佢竟然當咗個防烏蠅罩係遮咁拎出街用呀！

其實樂觀啲睇，唔小心當咗茶包係暖包咁用又點喎？最多咪唔暖。起碼呢位網民唔係調返轉將暖包當咗係茶包咁用吖～如果唔係，到時飲咗成杯暖包水先發現就gg了。

資料來源：motosuke516／twitter、紋君‬／‎爆廢公社二館‬

回帶：呀！點解會拎錯咗個防烏蠅罩出街㗎！