Pokemon Go 熱潮雖然好似退咗好多，但係總會有一班忠實fans對Pokemon不離不棄嘅！就好似結婚咁，無論對方變成點都會一樣執子之手，與子偕老㗎嘛。對於呢對新人，Pokemon一定好似婚姻咁神聖，所以搞咗個咁有心思嘅Pokemon主題婚禮呀！

一入到去就見到個螢幕出咗Pokemon 遊戲個logo，但係好似有啲唔同喎～介紹返，呢個唔係金銀版，係HW版呀，即係Happy Wedding 拱解呀～ 好明顯呢個Game就係歧視單身狗喇，自己一個人點Happy Wedding喎，嗚⋯⋯毒L就只能迷失喺呢場愛情遊戲中。

當然佈置就唔少得寵物小精靈嘅擺設啦，成個會場都隱藏咗唔同嘅精靈，睇下你部相機可唔可以Catch’em all！蛋糕上面仲有可以達成願望嘅小精靈基拉祈呀～莫非佢就係呢對新人嘅丘比特，幫佢哋達成願望，有情人終成眷屬？

最估佢唔到嘅係新人竟然自己準備咗呢段迎賓動畫，同遊戲畫面差唔多有九成似呀！玩家形象唔止有遊戲風格，仲係按住一對新人嘅外表畫㗎～由呢對訓練員同大家介紹返個婚禮同新人自己嘅故事真係寧舍有feel呀～ 唔知當年新娘係咪同新郎講「如果我贏咗你要同我交往㗎～」呢？如果係，好彩新郎唔係智爺咋⋯⋯

封面圖片及資料來源：sdc47_intel／twitter