雖然上強國網站買嘢成日中伏，不過大家都身體很誠實，一邊恥笑一邊係咁加入鳩嗚車㗎啦。網上shopping唔止抵買同方便，個賣家仲隨時送小禮物，嗰種surprise嘅感覺先最正吖嘛！

最近強國有個女大學生就收到好大個surprise喇！話說佢上網買咗個牙刷架，打開個包裝，入面竟然有隻老鼠仔同佢say hello呀！人哋啲小禮物最多咪得書籤呀橡筋呀咁，你就有隻老鼠仔喎，乜都抵返晒啦，我真係恭喜你呀！

個牙刷架上面仲沾有老鼠仔血跡?，唔通呢個係特別版「血染的風采」款式又要話你知咩。個女大學生收到呢份隱藏贈品之後，梗係即刻聯絡個客服多謝佢啦，客服嘅服務態度都好好，賠返5蚊雞畀佢呀！贈品收之餘仲退返5蚊咁多，唔怪得而家咁多人鍾意上強國網站買嘢啦！

冇上網買開嘢？都唔使灰嘅，隱藏surprise呢家嘢，只要細心啲，一定可以喺生活中發掘到㗎！就好似呢個風筒咁呀，吹得把頭髮咁順滑，都係全靠入面隻小強用自己嘅生命嚟滋潤吹出嚟嘅空氣咋！話唔定你一陣打開屋企個水煲都見到有條四腳爬爬㗎，係咪生命滿希望呢！

封面圖片、資料來源連結：新文化網、dcard

唔驚就睇埋：【諗起都想嘔呀】冷氣機入面竟然收埋老鼠化石