當呢個世界出現愈嚟愈多「整容整到成個假人咁嘅真人」同「像真度極高嘅假人」嘅時候，真人假人、假人真人，其實真係媽呀好亂呀.jpg……唔好話我哋呢啲升斗市民分唔到吖，分分鐘連受過專業訓練嘅警察都搞錯呀！

是咁的，話說喺紐約就有人喺街發現一個阿婆坐咗喺車入面，而且仲郁都唔郁、叫極都唔應咁款?！喂你哋知啦，紐約嘅冬天凍到連車都結埋冰，都唔知個阿婆係咪凍僵咗㗎嘛，所以呢位朋友仔咪即刻報警囉。

邊個咁冇心肝留低阿婆喺架車度呀？而警察搵唔切車主，就嗱嗱臨打爆個窗救阿婆，點知一爆完窗就發現個阿婆除咗成身凍冰冰之外，仲連心跳都冇埋！唔通……喂咪住先，睇真啲，乜係公仔嚟嘅喂？唔通呢個係最新嘅防盜系統？

事後問返車主，原來車主賣急救用品嘅，呢個阿婆咪係佢嘅示範model囉。雖然「婆婆」冇事，但車主就唔多高興喇，話晒都無啦啦畀人爆咗個車窗喎！不過咁，鬼叫你唔接婆婆返屋企咩，阿sir唔告你「不誠實使用阿婆」咪算好囉～老老77，爆錯車都總好過真係有個阿婆喺車入面凍僵吖係咪？

封面圖片及資料來源：每日郵報