有啲嘢只有有強迫症嘅人先會明白，見到個樣嘢好唔順眼，就一定要執返好佢！喺自己屋企就話好簡單，但面對咁大間嘅超市同便利店，咁多樣嘢都睇唔順眼，又冇理由逐樣幫佢執，剩低嘅就只有淡淡嘅無奈⋯⋯

最多可能好似呢位仁兄咁，將其中一格嘅貨架，執到跟返晒顏色、牌子同味道，已經係一個好高嘅成就喇！

不過如果你去到呢間日本既便利店，可能即刻會心情暢快好多呀～話說有個日本網民嘅朋友仔打算入便利店打個白鴿轉，點知就見到呢個驚人嘅場面啦！呢個咪係傳說中嘅「啫喱彩虹牆」？每種包裝啫喱都跟住個顏色排好晒㗎，簡直係強迫症朋友嘅天堂咁呀～

咁都未算勁呀，跟住係砌貨架之奧義，飯糰三角幾何拼合！飯糰同飯糰之間佮佮冚，好似砌Lego咁砌咗段飯糰長城出嚟呀！呢幾行飯糰已經唔止係整齊咁簡單喇，排到咁有後現代藝術感，店員你叫啲客點好意思拎呢？

､

有其他眼利嘅網民就發現呢個飯糰場景好面善，原來係喺日本動漫嘅《尼采老師》度見過呀！簡直就係神手複製呀，睇嚟呢位便利店店員係呢套漫畫嘅fans喎。btw，咁唔知呢位店員係咪都會用龜甲縛嚟綁雜誌㗎呢？

封面圖片及資料來源：nekottinyan／twitter、Pinterest