唔講唔知，原來俄羅斯戰鬥民族除咗膽色過人之外，原來仲好有愛心㗎！就喺早幾日咋嘛，俄羅斯有個農場發生火警，入面仲有成150隻豬仔受困?㗎！唉死啦，咁大火就算農場主人幾勇猛都救唔晒㗎喎……唔通真係要靠豬仔自己爆發俄羅斯血統嘅不死潛能衝出去？

好彩一眾猛男消防員及時趕到，一邊救火仲一邊衝入火場勇救豬仔！呢班豬仔就幸福啦，可以畀消防員強而有力嘅臂彎攬住，一定好warm好有安全感啦～hehe～

俄羅斯冰天雪地，加上人手有限，要用最快嘅時間帶呢班豬仔到安全嘅地方，都好考大家嘅合作精神㗎，而講到合作精神嘅嘢，又點會難到受過專業訓練嘅佢哋呢～睇下，佢哋將啲掌上肥豬一隻傳一隻咁傳出去遠離火場，話咁快就救晒班豬仔出去喇！

救走咗班毛都未出齊嘅豬仔，仲有一班燒到埋身都唔知咩事嘅大豬未識走呀，你哋班大豬淨係識食食食，就嚟變燒豬喇！要消防員趕先識走，真係畀你哋激死呀。

Yeah，任務完成！多得呢班咁有愛心嘅消防員，人同豬仔嘅生命都同樣咁重視，呢班豬仔先唔使一鑊熟咋！多謝你哋呀消防員！

封面圖片及資料來源：Ministry of Emergency Situations