寄嘢畀朋友係一門好大嘅學問，特別係寄畀老友，你又要諗點樣可以確保你寄嗰樣嘢安全，但係又要諗下點樣畀啲實派時佢喎，真係諗到頭到大埋呀。最好就係包到個郵件實一實，你老友都估唔到你寄咩，然後個郵件仲可以令佢睇到都O晒咀，咁就Goodest喇！

嘩，好多個鼻呀～係好多好打耳嘅海獅同兔兔呀～不過似乎收到嘅日本網友就唔多受落喎，喂，話晒呢隻牌子係靚紙巾嚟㗎喎，仲要出晒名又柔軟又有保濕作用，貴嘢嚟㗎啵，咁都唔開心？

梗係啦，人哋想要張SD卡啫，你畀咁多包紙巾佢托咩～人哋有老公㗎喇，唔似得你啲單身狗咁一日用幾包紙巾㗎，真係多謝夾盛惠喇！

不過，網友話呢個防撞物料都有好處嘅，至少張SD卡真係絲毫無損吖～但係佢真係用唔慣咁靚嘅紙巾囉。

所以話，就算想搵啲實用啲嘅防撞物嚟代替泡泡紙同膠袋，都要睇啱對象嚟㨂先得㗎～好似之前提過呢個賣家就醒呢，見個買家買成公斤嘅彩石朱古力，估到佢實係食家嚟喇，所以用返爆谷嚟做防撞物料，撞得又食得，真係睇見都開心呀！

封面圖片及資料來源：ahiru589／twitter、TenDieci／twitter

《特別嘅包裝技巧》：

【正呀喂】網購朱古力 賣家竟然用咁大包爆谷嚟做防撞物料？
【係小心嘅】用咁多填充氣袋就係為咗保護咁細件貨？