有玩開模型嘅都知，包裝盒對於模型嘅價錢唔多唔少都有啲影響。有盒定冇盒，個盒靚定殘，每個因素都影響住模型嘅定價。就算你唔打算拎去放，有得揀嘅都梗係可以儲埋個盒就最好啦～但係喺呢個充滿住土地問題嘅世界，儲紙盒呢家嘢實在太奢侈喇，不如好似呢位仁兄咁，化紙盒為神奇仲好啦！

嗱嗱嗱，通常砌完高達，阿媽見到你個盒一定會話砌完嘢個盒冇用就掉咗佢啦！最慘嘅係，連你自己都講唔出個盒有乜L用呀！最多咪放啲嘢入去當收納盒用，或者拆開佢變平面睇下點收埋囉。

呢個網民就將個包裝盒面頭隻高達逐忽剪出嚟，唔通想整砌圖？毛毛又9估下先，一定係想整細個啲妹豬成日玩嗰啲紙版換衫公仔！人嚟，拎條公主裙畀高達哥著！

咦，高達哥，冇見一排高咗又fit咗喎，係咪去做Gym嚟呢～

砌就係砌喇，不過唔係砌2D puzzle咁簡單，係3D砌返個高達出嚟呀～呢隻長腿高達就係用紙盒砌出嚟㗎喇。仲要整埋關節位，等佢可以做到唔同嘅動作，真係睇得又玩得，擺埋喺原裝高達隔籬都唔會失禮呀！話唔定仲可以賣畀啲買唔起原裝模型嘅窮L，話晒都係正版高達⋯⋯個盒喎～真係商機無限呀，呢鋪仲唔發過豬頭？

封面圖片及資料來源：kami_robo_yasui／twitter