喺香港大部分人都會揀拎免費報紙，但喺日本，有啲報紙唔止本地人會買，就連其他地區嘅人都想爭住買呀！梗係啦，日本作為動漫之鄉，連報紙都特別多聯乘活動，成版都係某套動漫嘅宣傳海報，做Fans嘅梗係要撲返份返去收藏啦！喺報紙落一版半版廣告都已經夠晒落本，但如果做到好似Granblue Fantasy咁就真係重量級宣傳喇！

就咁望落好似冇咩特別咋喎，咪又係一份普通嘅宣傳海報頭版～嗱，宣傳呢家嘢同做人一樣，就算幾有食力，有時都要識收埋，一晒冷先有實派㗎嘛！

開嚟見我！嘩，呢張超長海報，佔咗差唔多報紙滿版兩版幾嘅大細呀！差唔多全部角色都齊晒，就咁睇都覺得眼花啦，如果想搵返自己嘅本命出嚟都唔容易喎！你以為咁已經夠誇張？反埋去背面先講啦！

後面仲要出埋過去一年活動嘅Timeline同圖，Granblue Fantasy嘅Fans點可以唔儲呀？但有網民話，就算你喺日本都唔係度度有得買呢份特別版嘅朝日新聞，可能要喺東京都內，仲要喺專賣所買先有㗎⋯⋯

Granblue Fantasy 3周年宣傳之前仲公佈咗會有大抽獎，除咗一般遊戲活動會送嘅虛擬禮物，仲現兜兜拎咗1000萬円出嚟做頭奬?！所以喺朝日新聞落咁大版嘅廣告，簡直濕濕碎啦～冇呀，毛毛點會為咗嗰區區1000萬円dl個game啫，係都係為咗六十幾萬港幣咋嘛！

封面圖片及資料來源：aki_hinasaki／twitter