2017年03月13日 星期一
【傻傻分不清】媽咪，老師話帶多肉植物，唔係豬肉啵…
唔知大家仲記唔記得細個讀幼稚園嘅時候，第一次種植物嘅情形呢！毛毛仲記得一清二楚㗎，用棉花濕啲水，擺粒綠豆落去，過幾日佢就會開始發芽㗎喇，幾振奮人心呀，即刻記低落工作紙先！但係，過咗一星期，張小綠豆觀察工作紙做完之後，條芽菜都會唔見咗，晚夜食飯先知畀阿媽摘咗嚟炒餸囉……
聽講種綠豆太小兒科喇，學埋晒啲咁嘅嘢，幫到小朋友入名校咩！一於學下咩叫多肉植物啦，即係根莖特別肥大、可以儲存水分嗰啲呀，都唔明呀？即係仙人掌同蘆薈呢類呀。（其實毛毛都係讀高中先識咋陰公）
「媽咪，點解人哋啲多肉植物係綠色，我呢嚿就肉色嘅……」
嗯嗯，你同嚿生豬肉擺埋一齊咪「多肉」囉，加埋同學仔帶返嚟嘅仙人掌，咪就係「多肉、植物」囉，都冇錯吖係咪……李龍基都係李龍同李基溝埋一齊啫，睇開啲啦細佬。
而家興活動教學呀，萬聖節梗係要帶個南瓜燈籠返去玩下、應下節啦。咦，右下角呢個小朋友，你個南瓜都好特別下喎……其實佢只係走前大家一日，帶咗萬聖節後，準備畀人煮嚟食嘅南瓜返嚟啫。
做小朋友，都一樣要貼地，學下點照顧自己嘅，老師就叫班小朋友帶小型家電（好似風筒、小喇叭呀咁）返去認識下點用喇。於是，呢日幼稚園就出現咗部洗衣機……老師大人，今次毛毛駁唔到喇。
封面圖片、資料來源連結：姑蘇晚報
《求心理陰影面積》
