都叫咗你班人「上網要小心，慎防意外生」㗎啦，你以為淨係假貨比真貨嘅強國出品先有伏咩，就算你上外國網度買都一樣有機會出事㗎，你估人哋大大隻字寫住皇冠級賣家就一定有良心㗎咩，點都有啲害群之馬嘅～

其實有得揀邊個想咁搏吖，就好似絕版波鞋咁，下下都唔夠人抽，咪逼住上網食炒價囉⋯⋯

好似呢對原價2000港幣左右嘅Adidas Yeezy Boost 350 Turtle Dove，聽講話炒到上過萬喇喎，咁網友上去「電子海灣」度見到有人賣750美金，即係差唔多六千銀港幣，梗係9衝去買啦！咁抵，唔通賣家覺得呢輪賺夠，好想畀人賺下？

古乳有暈，便宜莫貪呀，六千蚊雖然都係炒價，但係你覺得啲炒家真係會賺少啲賣畀你？少年，你太年輕了！

網友收到嘅係一對Yeezy Boost同款嘅拖鞋呀！威啦你，特別版都畀你買到，我真係恭喜你呀！

嘩，真係好啱身呀～網友你又唔好咁嬲，至少個size冇呃你呀～比起嗰啲買個貓抓臺畀主子，點知送到嚟變咗掌心版，你起碼仲著得落吖嘛～55，聽日著埋出街一定會仲7㗎啫～你話係唔係呀，哈姆太郎？

雖然呢對鞋帶挈唔到網友變潮人，但起碼都幫到佢呃like吖～幾多人買一堆正版名牌都唔夠你嚟呀，搞到連Buzzfeed都搵你做訪問喎，都叫發揮咗作用，唔算違反晒商品說明條例吖，好似係。

封面圖片及資料來源：Max Hoang Trinh、Sneaker news