新聞話日本薯仔失收，所以卡樂B會停售十幾種味嘅薯片喎⋯⋯嘩嘩嘩！真係世界末日、慘無人道呀！

而對一眾網民嚟講，最大嘅打擊莫過於冇咗Pizza味薯片。日版Pizza味薯片嘅精粹就在於上面啲半溶芝士吖嘛，夜晚一邊煲劇一邊食大包裝嘅Pizza味薯片都不知幾爽皮！如果冇咗Pizza味薯片，咁人生仲有咩意義喎！

為咗尊重屋企所剩無幾嘅幾包存貨，呢位日本網網決定喺呢款Pizza薯片消失前試一次極邪惡嘅食法！

登登登櫈，就係喺呢堆本來已經有好多芝士嘅邪惡薯片上面，再灑滿萬惡嘅芝士碎，然後再將兜薯片叮熱呀！睇下，一兜極邪惡嘅拉芝Pizza薯片就係咁樣完成咗嚕～

本來喺薯片上面嘅芝士溶晒喺薯片入面，加埋新加嘅芝士，兩種香味混為一體，真係睇到都流晒口水⋯⋯實在係太好味，實在係太銷魂喇！如果以後食唔返點算呀！

btw，其實大家又唔使咁Sad嘅，而家消息話大包裝會停售啫，話唔定普通裝仲有得賣呢？希望在明天呀嘛！另外，雖然卡樂B話港版嘅薯片唔受影響，但對唔少食家嚟講，始終都係覺得日版好食啲⋯⋯

#唔知點解呢 #呢啲係咪叫隔籬飯香

封面圖片及資料來源：nonosaki_risa／twitter