外國嘅月亮係咪特別圓呢，毛毛就唔知喇，不過可以肯定佢哋有嘅空間大過香港好多囉。話晒外國冇乜土地問題，啲小朋友唔使同阿哥家姐細佬妹迫碌架床，可以自己一間房、瞓晒大大張床之餘，就連佢哋啲公仔都有張床仔，真係好幸福呀！

細路仔最鍾意就係玩角色扮演㗎喇，佢哋平時接觸得最多嘅人就係媽咪，所以要扮都一定係扮媽咪啫！攬住隻公仔當佢BB咁，仲要特登買多張床仔畀公仔瞓，體驗下媽咪湊自己有幾辛苦，都係好事嚟嘅～

連公仔都可以有自己嘅床，公平咩！公平呀，因為最近加拿大嘅IKEA就捐咗10張玩具床仔去動物中心，畀班喵星人瞓喇～

老老竇竇，有頭髮，邊個想食咖喱吖？你估動物中心唔想買啲床舖被冚畀班流浪喵星人暖笠笠咁瞓咩？不過佢哋係非牟利機構，冇咁多錢錢吖嘛～多得姨媽送咗啲床仔畀佢哋，喵星人先可以唔使再瞓凍冰冰又硬掘掘嘅地板咋！

有床仔瞓，梗係舒服得多啦，不過相信呢班喵星人最渴望嘅，都係有個充滿愛嘅屋企，日日有奴才服侍～希望大家都支持領養不棄養，做個負責任嘅剷屎官啦！

封面圖片、資料來源連結： etobicokehumanesociety／instagram、Ikea、Metro